Ortha an Tuama

De Bheoibh nó De Mhairbh an chéad úrscéal grafach as an tríológ ón mbunsraith Fraincise Outre Tombe scríofa ag Jean agus Simon Léturgie agus maisithe ag Richard Di Martino. Anois, tá sé aistrithe go Gaeilge ag Seaghan Mac an tSionnaigh agus foilsithe ag Dalen Éireann.

Díríonn sé ar ghrúpa déagóirí atá ag freastal ar chóisir bhreithlae agus tagann casadh uafásach sa scéal a chuirfidh an scannán Shaun of the Dead i gcuimhne do léitheoirí. Tá Lís fiche bliain agus í ag ceiliúradh an cloch mhíle le cóisir tí ag a teach. Nuair nach bhfuil a cara Neidí ag mothú go rómhaith déanann cara eile, Pól, manglam aisteach de dheochanna dó. Ach ní hamháin go n-ólann Neidí an manglam, ach ólann athair Líse, atá ina bhaintreach ó cailleadh máthair Líse le déanaí, ón manglam dainséarach. Téann cúrsaí in olcas nuair a éiríonn Neidí tinn agus téann a urlacan isteach sa reilig áitiúla, áit a dtéann sé chuig na corpáin atá curtha ann.

Gluaiseann an scéal ar aghaidh ar luas lasrach le heachtraí a éiríonn níos aistí agus níos aistí: eolaí agus athair craiceáilte Líse ag aiséirí a máthair agus ag taispeáint corp mháthair Líse don slua ag an gcóisir, an Sirriam Mac Tíre ag teacht chuig an teach ag cuardach dúnmharfóir srathach, máthair Líse ina zombaí ag iarraidh daoine a ithe…
Téann Lís agus a cairde síos chuig an reilig chun féachaint an bhfuil a máthair aiséirithe ón mbás ach buaileann siad leis na corpáin eile atá aistrithe ina zombaithe a bhuí den mhanglam a bhí in urlacan Neidí. Nuair a fhilleann siad ar an teach, tá rudaí ina cíor thuathail, Líse agus na zombaithe ag druidim i dtreo an tí de réir a chéile. An mbeidh na déagóirí in ann an lámh in uachtar a fháil orthu agus stop a chur leo? Tá sé suas dóibh féin mar gheall go bhfuil na póilíní gafa leis an dúnmharfóir.
D’éirigh le Seaghan Mac an tSionnaigh luas agus gluaiseacht an scéil a choinneáil go beacht chomh maith leis an stíl nua-aimseartha atá ag an mbunleabhar. Ní hamháin go bhfuil na comhráite nádúrtha ach tá beocht faoi leith ag na comharthaí uaillbhreasa atá tríd an scéal ar fad. Tá noda d’Éirinn ann freisin mar shampla nuair a luaitear ainm an mhanglaim mar ‘Poitín Jim Phait Willy’.

Taitneoidh an scéal craiceáilte seo go mór le haon duine gur maith leo na scannáin Scary Movie agus Shaun of the Dead agus scéalta lán zombaithe agus diabhlaíochta.