Na Trí Mhuicín

Tá an scéal traidisiúnta faoi na Trí Mhuicín léite agus cloiste ag cách faoin am seo, ach cuireann an athinsint seo beatha úr ann mar chuid de shraith Futa Fata d’athinsintí véarsaíochta síscéalta clasaiceacha. Seo an dara leabhar sa tsraith sin, tar éis ‘An Slipéar Gloine’ a insíonn scéal Luaithríona. Tá na Trí Mhuicín scríofa ag iar-Laureate na nÓg, Áine Ní Ghlinn, agus maisithe ag Paddy Donnelly.
Buailimid leis na trí mhuicín, Crúibín, Pincín agus Láib, trí véarsaíocht shnasta atá ag borradh le greann agus spraoi. Tá an scéal inste arís go paiteanta ag Áine Ní Ghlinn faoi Chrúibín a dhéanann teach tuí, Pincín a dhéanann teach cipíní agus Láib a dhéanann teach brící.

Le linn spraoi uile phleidhcíocht na muicíní beaga, tá rud éigin i bhfolach sa dorchadas ag faire orthu. Tá an oiread sin spraoi ann do léitheoirí atá ar an eolas faoin rún seo agus atá in ann an mac tíre a fheiceáil ag fás agus ag méadú agus é ag tarraingt níos gaire ar na trí mhuicín aineolacha. Tá téama daite tugtha go cliste ag Paddy Donnelly do gach muc: tá Crúibín agus a theach tuí buí, tá Pincín agus a theach cipíní glas, agus tá Láib agus a theach brící bándearg. Tá an mac tíre dainséarach difriúil, é dúghorm, agus é ag lúbarnaíl timpeall na leathanach agus a dtithe. Ní chuireann Paddy oiread is milliméadar amú sna leathanaigh seo lán datha agus fuinnimh a thagann go foirfe leis an téacs.

Gluaiseann an scéal ar aghaidh ar luas lasrach agus an mac tíre gránna ag éirí níos ocraí agus níos neamhfhoighní. Tá na hidirghníomhaíochtaí agus an chaint idir na muicíní agus an mac tíre go hiontach agus is cinnte go mbeidh páistí ag screadach amach in éineacht leis na muicíní scanraithe:

“Imigh leat anois go beo, ní ligfear thú isteach go deo.”

Ar ndóigh ní neart go cur le chéile, agus tagann na trí mhuicín le chéile leis an mac tíre a chloí i gcríoch shásúil. Athshamhlú úr iontach scéil thraidisiúnta is ea é seo ina n-úsáidtear an teanga go barr a maitheasa chun leanaí a mhealladh agus a chur faoi dhraíocht.