Léirmheas le: Úna Nic Cárthaigh
Seo chugainn sraith leabhar cairtchlár le trí leabhar álainn (go dtí seo) ann: Nano agus na huimhreacha, Nano agus na dathanna agus Nano agus na mothúcháin.
Tá na leabhair seo idéalach do pháistí óga ó thaobh simplíocht de, ó thaobh na foghlama de, ó thaobh léaráidí tarraingteacha de agus ó thaobh dearadh de. Is leabhair bheaga chearnógacha iad a sheasfaidh lámha beaga á láimhseáil agus úsáidtear bundathanna geala le go leor buí, gorm agus dearg le feiceáil.
Tríd na leabhair ar fad leanaimid an príomhcharachtar Nano – carachtar ubhchruthach buí le cluasa ar nós adhaircín agus srón ubhchruthach a athraíonn dath de réir na leabhar agus de réir mothúcháin freisin. Mar is dual do stíl ealaíona Andrew Whitson, nó Mr Ando mar is fearr aithne, tá línte tiubha dubha in úsáid agus léiríonn siad seo mothúcháin éagsúla ar aghaidh Nano go soiléir.
Is leabhair áille iad seo don fhorbairt teangan agus foclóra sa pháiste óg. Sa leabhar Nano agus na huimhreacha, téann an léitheoir ó uimhir a náid go uimhir a deich, a leathanach féin ag gach uimhir agus an uimhir tugtha mar dhigit agus mar fhocal. Agus Nano ina shuí ar chraobh crainn, tá calóga sneachta ag titim thart timpeall ar Nano de réir mar a ardaíonn na huimhreacha, go dtí go bhfuil brat bán sneachta faoi chosa Nano. Is leabhar iontach é don chomhaireamh os ard.
Sa leabhar Nano agus na dathanna, foghlaimímid faoi na dathanna agus iad scríofa go simplí agus go soiléir ar gach leathanach. Sa scéal seo tumann Nano isteach sa bhfarraige sa fomhuireán chun ainmhithe mara a fheiceáil. Buaileann sé le go leor acu; iasc, capall mara, smugairle róin agus narbhal ina measc agus dath difriúil ar gach ceann acu. Taispeántar deich ndath sa leabhar seo, scríofa i gcló mór soiléir agus léirithe tríd na n-ainmhithe mara. Tá gluais úsáideach ag tús an leabhair le hainmneacha na n-ainmhithe atá cabhrach do thuismitheoirí agus caomhnóirí agus iad ag léamh leis na páistí.
Sa leabhar Nano agus na mothúcháin, feicimid Nano ag mothú aon mhothú dhéag difriúil agus a aghaidh léirithe ar bhealach álainn soiléir ag Mr Ando. Úsáideann an scríbhneoir Caitríona Nic Sheáin Gaeilge shimplí, shoiléir agus shaibhir chun na mothúcháin a chur in iúl. Tá na cinn níos coitianta ann ar nós ‘Tá brón ar Nano’, ‘Tá áthas ar Nano’ ach freisin tá cinn eile tábhachtach ar nós ‘Tá Nano trína chéile’ agus ‘Tá Nano ar bís’. Léirítear na mothúcháin ní hamháin tríd aghaidh Nano ach le héiníní beaga atá ag féachaint agus ag freagairt do mhothúcháin Nano. Tá sé an-tábhachtach go bhfuil an foclóir ag páistí óga chun a mothúcháin a chur in iúl agus is cinnte go gcabhróidh an leabhar iontach seo an foclóir sin a mhúineadh dóibh.
Is leabhair iad seo atá thar a bheith éifeachtach do pháistí óga agus tá súil agam go bhfeicfimid tuilleadh sa tsraith. Tá QR cód ar chúl a thugann léitheoirí chuig an scéal os ard ar Vimeo sna trí chanúint: Gaeilge Uladh, Gaeilge na Mumhan agus Gaeilge Chonnacht, áis atá déanta go snasta ag an bhfoilsitheoir An tSnáthaid Mhór.
